Poslovne vesti - Makedonija

РеплекФарм со престижниот GMP-сертификат

Македонската фабрика РеплекФарм го доби GMP-сертификатот за добра производствена пракса, што претставува престижно признание за квалитет во областа на фармацијата.

Со тоа скопската фармацевска компанија со 10-годишно искуство веќе е признаена од Европската комисија, а тоа истовремено значи признание на квалитетот на нејзиното производство во сите земји од Европската унија.

Сертификатот на РеплекФарм му ги отвори вратите не само кон ЕУ, туку и кон другите земји во светот. Според Иван Туџаров, генерален директор на РеплекФарм, сертификатот ќе овозможи нивните лекови да бидат пласирани на европските пазари, а тоа истовремено е афирмација на името на Република Македонија.

- Од нашето отворање пред 10 години ние се бориме да го добиеме овој сертификат. Тоа е многу тешко и затоа последните две-три години интензивно работевме. Имавме добар партнер во една словенечка компанија која веќе има ваков сертификат и доста ни помагна во остварување на овие норми - истакна Туџаров при јавната презентација на GMP-сертификатот. Тој смета дека овој сертификатот ќе им помогне многу во освојување на нови пазари, како што е европскиот, северно-африканскиот и блискоисточниот пазар.

Сертификат во превод значи добра производствена пракса што е синоним за добро организирана фармацевска пракса која овозможува на земјите што се надвор од ЕУ да почнат со регистрација на своите лекови.

Туџаров информира дека веќе почнале и со регистрација на лекови во Словенија и преку неа одеднаш во 27 европски земји.

- Со овој сектификат нашите документи се прифатени од сите агенции, освен од Американската, но и тоа ќе го добиеме до крајот на годинава - вели Туџаров и додава дека до крајот на годинава очекуваат сертификација на РеплекФарм и од страна на FDA -Агенцијата за храна и лекови на САД.

На домашниот пазар РеплекФарм е застапен од 10 до 12 проценти, останатиот дел се извезува во повеќе земји меѓу кои Русија, Србија, Косово, БИХ, Хрватска, Албанија, Туркменистан, Нигерија, Уганда и Габон.

Перспективите на компанијата се големи бидејќи сертификатот ќе овозможи да се воведат на македонскиот пазар нови генерики што досега не биле пласирани.

- Производството на РеплекФарм во моментов е околу 10,5 милиони евра, при што се произведуваат околу 156 видови на лекови - вели Туџаров. Тој нагласи дека светската економската криза не влијаела позначително на работењето на компанијата и остварени се позитивни финансиски резултати. Туџаров за идната година најави вработување на околу 50 високостручни кадари, а кога ќе се прошират на американскиот пазар бројката на нововработени лица ќе биде уште поголема.